Meghalaya a·dokni skulrango chess kal·aniko ra·gatna “Queen’s Gambit” Chess ko State Council of Science, Technology & Environment (SCSTE) aro Meghalaya Chess Association bakrime kam ka·na tik ka·angaha. Chess kal·aniko skulo ranta ka·aniko dakatna Councilni Program Officer C. M. Marak aro L. Diengdoh na jako ra·e kamko chu·sokatchina daitoko pakwatangaha.
Ia cholko bako ra·na sikgipa skulrangko SCSTE ni website “scste.org” o napange http://scste.org/explore/chess-form/ o sikdepe dorgastoko galna ba uamangni on·gimin QR code o scan ka·china u·iatangaha. Ia gitalgipa programko skanggipa bilsio skulrangna u·iatnagita a·bachengatanggen jeon Meghalaya Chess Association oni changgipa sapgipa skigiparang bakko ra·gipa skulrangona re·ange All India Chess Federation (AICF) ni tarigimin chessko skiani syllabus o pangchake skie on·anggen.
Skulrango chessko skina a·bachengani chu·sokgipa ong·nagita sapgipa skigiparang chola gananiko ja·rikna nangani bidingo aro chatro chatrirangni ku·sik jakkalanio pangchake English, Khasi, Jaintia aro Garo ku·sikrangchi skie on·anggen. Ian dingtang mancha bi·sarangni gisikko tarina aro chanchianirango apalbatatna miksonge dakenggipa program ong·a jean uamangni poraia skianioba chess kal·ani namgnirangchi dakchakaniko ong·anggen.
