South Garo Hills Baghmara jolo adita namdapatna aro silroroatna nangenggipa kamrangko janapate Southern Zone A’chik Holistic Awakening Movement (AHAM) dolrang Chief Minister Conrad Sangmana Memorandumko on·angaha.
Skanggipao Baghmara songjinmao Captain Williamson Memorial Govt. College ge·sa kamkam degreeko pakwatenggipa skichakram ong·ani gimin Science aro Commerce poraiani a·bako ra·gatchina AHAM dolrang mol·molangaha. SGH a·jao chu·ongagita poraiani cholrangko man·jae technical course ko dakna man·jaenga. Science aro Commerce ko a·jatango poraina man·jae bang·a namgipa chatro chatrirang gipin a·barangko poraianiona sokenga aro gipin biaprangchi poraina tangka paisarangnigita chol ong·jae poraianiko dontongna nangenga ine AHAM dolrang parakangaha. Science aro commerce ko a·jatango ra·bagenchimode chatro chatrirangna medical, engineering, basic science, technology, accounting, banking aro gipin gadangrangko poraie an·tangtangna kamtangko seoke ra·na cholko on·anggen ine AHAM dolrang parakangaha.
Baghmara aro wilwilao donggipa manderangni kal·ani a·bao chu·ongagita cholrangko man·jaengani gimin a·jani chadamberangna cholko on·e tang·doatna football stadiumko rikchina AHAM dol mol·molangaha. Songjinmao namgipa poraichakram biaprang dongjani bidingoba janapate AHAM dolrang auditorium baksa libraryko ra·bachina janapangjolaha. Baghmara songjinma sima ari sepangjolo donggipa biap ong·e nalsa a·song baksa namgipa bading chiwalani cholrangko songdongenggipa manderangna on·a aro dake cha·aniko nakatate jolni chu·gimik tang·doanina International marketko rike on·chinaba mol·molangaha.
NH-62 ramako daldapate tarie on·china aro Siju-Baghmara gita re·gipa Dainadubi oni NH-51 Karonggre ona dakbagipa rama namsrangjahani gimin namdapate ta·rake tarichinaba AHAM dolrang chittio janapjolaha. Ia ramarango chirang skonge dongani aro mitchigipa banarang ong·aniko nikna man·enga ine AHAM dolrang u·iataha. Ramarang nosto ong·anichi re·ruraenggipa manderangna neng·nikaniko on·engani gimin jako ra·enggipa departmentrangko ta·rake kam ka·china AHAM dolrang mol·molataha.
Unbaksana Tourismni a·bako namdapatna aro janggi tanganiko tang·doatna AHAM dolrang Baghmara songjinmako aro wilwilao donggipa songrangko nitoatanio kamko ka·china mol·molangaha. Iachi songre songgabatgiparangkosan re·bana didiataigija jatni daka rika, bewal aro nitoanikoba mesokna chol ong·gen ine uamang aganangaha. Una agreba SGH ni tourismo chu·gimik tang·doanina 5-Star hotelkoba tarie on·china AHAM dol mol·molangaha.
Iasan ong·aigija a·jao Balpakram NP, Chitmang a·bri aro Simsang chibamni nitoaniko name rakkina a·brirangko doe niani, songreani aro dongkamanirangko dakatchina AHAM dolrang bon·kame mol·molangaha.
