Swachh Bharat Mission (Grameen) ni nigita jabolrangko sale galnagita bol 101 e-Vehicles ba battery chi chalaigipa garirangko Garo Hills ni gimik a·jarangni man·a kragipa manderangna aro adita dolrangna Jengjal Bajek Airport-o Assembly ni Speaker Thomas Sangma aro PHE Minister Marcuise Marak da·al salo suale on·angaha. Ia programo Kharkutta ni MLA Rupert Momin, Salmanpara ni MLA Ian Botham Sangma, PHE ni Commissioner & Secretary, PHE ni Chief Engineer, Swachh Bharat Mission (Grameen) ni Director, WGH ni DC aro adita dilgiparang dongpae bakko ra·angaha.
Ia Swachh Bharat Mission (Grameen) programara ma·mong sorkarini Ministry of Jal Shakti ni ning·o kamko ka·ani ong·a jean songadamrango Open Defecation Free (ODF) ba bangbango jabolrangko galaniko name chimonge wilwilako rongtale rakkina ja·ku de·ani ong·a ine PHE Minister Marcuise Marak aganangaha. “Ek Kadam Swachhta Ki aur” katta bichongo pangchake man·a dipet biaprangko chu·gimik rongtale rakkina aro jabolrangko simsake galna man·agita ia e-Vehicles rangko sualangaha. Ia garirang changsa battery chu·gimik charge ka·achi km 100 mang re·na man·gipa ong·a.
Indake batteryni garirangko jakkale wal·ku ong·atgija chalaina man·aniara namen nambegipa ong·anggen aro Meghalaya a·dok ODF ko 83.36% nigita chu·sokaha jeon a·songni bilsianti 88.8% ong·rongbewalona sepangpilaha ineba Marak aganangaha.
