Da∙o class 12 ni gadango porikkako seenggipa chatro chatrirangna mikkangchi uamangni Central University rango Under Graduate (UG) ni gadango poraina National Testing Agency (NTA) nigita a·song gimiko ming 13 ku∙sikrangchi Common University Entrance Test (CUET) porikkako senagita dorgastorangko galna bon∙kamgipa salko ia jani 26 tarikko Directorate of Higher and Technical Education u·iatangaha. Ia CUET porikkako Computer-Based Test (CBT) ba Pen aro Paper-rangko jakkale porikka ra∙nagita tik ka∙anikoba u·iatangaha.
NEHU ge·sa Central University (CU) ong∙ani gimin CU nigita dongimin niamo pangchake CUET porikkako ra∙na tik ka∙aniko dakangaha. Iani bidingo class 12 ni gadango poraienggipa chatro chatrirangna pilak Higher Secondary Schoolrangko chalaienggipa Principalrang u∙iataniko dakchinagitaba janapate parakataha.
