Da∙al salo WGH a∙jani District Legal Services Authority (DLSA), Tura aro Meghalaya State Legal Services Authority apsan bakrime Legal Awareness Program ko Kherapara antidamo ong∙atangaha. Ia programko manderangna adita niamrangni bidingo ma∙sie ra∙na nanggnirangko DLSA pangnan ong∙atrongenga.
Ia programni bako DLSA ni Chief Legal Aid Defence Counsel, Rania K. Marak me∙chikrangni kosako nokdango namggijagipa obostarangko chagronganio dakna nanggni aro ma∙sie ra∙nagita “Protection of Women from Domestic Violence Act, 2005” o pangchake naljoke dongani cholrangko agantalate on∙angaha. Indakgipa obostarangko chagronge court chi re∙na neng·nikgenchim ong∙ode WGH a∙jani One Stop Centre rangona re∙ange dakchakaniko ra∙epachina Marak agantalatangaha.
Unbaksana je nokdangoba segipa jikko gale katgenchimode Section 125 Cr PC niamo pangchake bi∙sarangko aldunagita ma∙gipa cholko ra∙na man∙gen. Iarangko dakna skang Legal Aid Counsel ni u∙igipa aro ma∙sigiparango sing∙sandie ra∙chengna nanganikoba Marak aganangaha. Unbaksana detangko pekatgipa bosturangko jakkalaoni aro badingarangoni baljoke naljoke rakkichinaba mol∙molangaha.
Una agreba bilsi chu∙ongkugijagipa me∙chik bi∙sarangni kosako kragija kal∙akanirang da∙ororo batroroengani gimin aro me∙chik bi∙sarangni bilsi chu·onggija an∙o dongaoni naljokatna man∙agitaba ma∙aparangko bi∙sarangna simsakchina Marak didiangaha.
