Mijal salo West Garo Hills Darechikgre songo ge·e game cha·giparangna NEHU Tura-ni Agri-Business Management & Food Technology (ABMFT) department, “Value Addition of Agri-Horti Product” katta bichongko ra·e Awareness cum Training programko ong·atangaha. Programona sak 70 ge·e game cha·giparang re·bae bakko ra·angaha jeon uamangna department-ni chatro chatrirang ge·e game man·gipa bolam biterangoniko bosturangko tarina, tepna aro bading chiwalani cholrangko skie on·angaha. Unbaksana uamangna komilani marmalade, strawberry jam aro agri-tourism ko tang·doatani bidingoba skie on·angaha.
Ia programo NEHU Turani Vice Chancellor Prof. P. S. Shukla dongpae uni agananirangchi bakko ra·gipa sakantina didianiko on·aha. Ua dingtang mancha ge·a gamanichi agri-tourismni namgnirangko talatangan baksa FPO rangko bikotchina aro joltango man·gipa biterangoni bosturangko tarie pale sim·e cha·ani cholrangko tang·doatna aganangaha. NEHU Turani Campus Director, Prof. Sujata Gurudev ge·a gamanichi janggi tangani gadangko tang·doatani bidingo aganangaha aro departmentni HOD Prof. Deepak Bhagat ge·e game man·giminrangko antidamrangona sokate pale sim·e cha·ani cholrangni bidingo aganangskaaha.
Program a·bachengao program coordinator Assistant Prof. Gino A. Sangma rimchaksoani kattarangko aganangaha aro mittelpilskaaniko departmentni Assistant Prof. Sheena Haorongbam chi matchotataha. Program matchotao bakko ra·gipa manderang uamangna skie on·ani gimin kusi ong·aniko parakangaha jean uamangna skanggipaba ong·enga aro re·baenggipa sal somoirango bang·a programrangko ong·atangkugen ine parakangaha.
