South West Garo Hills a·jani Nogorpara songo donggipa Katta Beel Tourist Facilitation Centre ko a·songni Prime Minister Narendra Modi da·al salni bako Srinagar Bakshi Stadium-oni video conference ka·e oprake on·angaha. Ia programko a·jani District Administration aro Tourism Department ong·atangaha.
Ia programona Rangsakona ni MLA Subir Marak, Nogorpara ni MDC Linekar Sangma, Boldamgre ni MDC Stevie Marak, CM ni ma·gipa Ma Soradini Sangma, Union Ministry of Tourism ni Secretary Manju Mann, SWGH ni SP Vikas Kumar, adita skul collegerangni Principal rang, District Heads, NGO ni dilgiparang aro jolo songdongenggipa manderang dongpae bakko ra·angaha.
Rangsakona MLA Subir Marak, ia nambegipa kamrangna kusi ong·e PM Modi aro a·dokni CM Conrad Sangmako mittelpilangan baksana mikkangchi tourism ni a·bao baikamgipa ong·atna dakchakangkuchinaba didiangaha. Unbaksana mikkangchi project rangko ra·baanio Pelga Dare koba niatchina Ministry of Tourism ko mol·molangaha.
Ia projectko SWGH na ra·bae jolna chu·gimik tang·doaniko on·anina mittelpilani kattarangko a·jani DC RP Marak aganange indakgipa project rangko ra·bae on·anichi tourism ni a·bao songsalna namgniko, kamrangko nakataniko aro kajina man·aniko tang·doatnagita man·anggen ine agandapangaha.
Katta Beel Tourist Facilitation Centre na bilsi 2019-20 o 2.65 crore mang tangka paisarangko chamataha jeon kosakgipa gadangni noko kutturi ge 5 baksana auchakani dongchape rikaha aro ka·magipa gadango babilsi, cafeteria aro rochakram biap donge rikskaaha. Ia centre ko rike on·anichi jolo songdonggipa manderangni changa sapaniko, dakbewal rikbewalko, ska koaniko aro sol·a repaniko mesokangnagita dakchakani ong·anggan baksana SWGH ko tourism ni a·bao tang·doatna ja·ku de·aniko mesokani ong·a.
