Mijal salo Rangsakona ni MLA Subir Marak, SWGH Rerapara blockni ning·o ga·akgipa Watregre Songma Sub-Centre ko nokdonggae on·angaha. Ia Sub-Centre ko oprake on·anio Assistant Commissioner aro Rerapara Block Development Officer Armand Ch. Momin, District Medical & Health Officer Dr. H. Barman, District MCH Officer Dr. Noreen A Sangma, Rangsakona PHC Medical & Health Officer in charge Dr. Hollington A. Sangma, Watregre songni Nokma aro songni manderangba dongpae bakko ra·angaha.
Ia jolo nangchongmotgipa Sub-Centreko Prime Minister Ayushman Bharat Health Infrastructure Mission (PM-ABHIM) ni ning·o gong lakh 55 mang tangkarangko chamate rikaha jean da·o dam 14 songrangoni sak hajal 5 manderangna sanna bannaniko on·a dakchakanggen. MLA Subir Marak ia Sub-Centreko an·tangtangnigita chacha simsake jakkalchina aro manderangko sanna bannani cholko ra·chinaba didiangaha.Iia Sub-Centre an PM-ABHIM scheme ni ning·o matchote Garo Hills o skanggipa nokdonggachenggipa ong·a ine District Medical & Health Officer Dr. H Barman aganangan baksana manderangna nama skanikoba on·angjolaha.
