Prime Minister Narendra Modi Arunachal Pradesh Itanagar ona salsani programme na re·angani somoio, Tura IT Park aro Dalu o Football Stadium ko rikna video conference gita da·al salo pangchakani ro·ongko songe on·angaha.
Uni Arunachal ona re·anganiara, a·ninggita tarigipa rama jean a·gilsako ro·batgipa rama dilgni gnanggipa ‘Sela Tunnel’ ko oprake on·an baksana a·songo chubatgipa Dibang Multi Purpose Hydropower Project na pangchakani ro·ongko songe on·agita ong·a. Northeast ni dam 6 a·dokrango jekai Arunachal Pradesh, Sikkim, Nagaland, Manipur Tripura aro Meghalaya o dingtang dingtang project rangko oprake on·an baksana pangchakani ro·ongrangkoba songe on·angjolaha jenan gong 55,000 crore tangkarangko chamataha ine Prime Minister aganangaha. Unbaksana Meghalaya a·dokko tang·doatnagita dingtang dingtang projectni kamrangna 300 crore tangkarangko chamataha ineba aganangaha.
Itanagar o Prime Minister ni programme ong·aniko WGH Deputy Commissioner ni Office o live telecast ka·aniko, a·jani DC Jagdish Chelani, Department rangni Headrang, dingtang dingtang skul aro college rangni skigiparang aro chatro chatrirang bakko ra·e niangtokaha.
