GSU Karukol Unit dolrang mijal salni bako South Garo Hills Nokatgre songona ro·ongko bikotna am·enggipani bidingo re·ange nie ua jolni manderang baksa agan golpogrikanirangko dakangaha. Nokatgre songni manderang baksa golpoani ja·mano je biapkon ro·ongko bikotna on·mangipaniko bikotgija, nitobegipa aro a·doko chubatgiparangoni damsa Renang dare kosakoniko bikotna am·enganiko u·inagita man·angskaaha ine GSU Karukol Unit ni President Nikudimush R. Marak aganangaha.
Indake on·gimin biaponiko bikotgija dingtang biapona apjite ro·ongko bikotaniara Renang dareko nisiatani ong·gen aro ua chiringko jakkalgipa songni manderangna namen neng·nikanirangko on·anggen ine GSU dolrang raken jegalaniko dakangenga. Iani bidingo District Administration aro Rongara-Siju ni MLA Rakkam A. Sangma ko nirokate kamrangko ka·angchinaba President u·iatangaha.
Nokatgre songni Nokma mikkangchi namgijagipa obosta ong∙gniko maming chanchisamsoa gri chiring sambaniko ro·ongko bikotana hukum on·manaha ine ua songo songdongenggipa mande saksa u·iatangaha. Indake ong·engani gisepon je biapkon ro·ong bikotna sima ariko toe on·manahachim ua biaponi apjite uno dongenggipa nokdang ge 5 rangni gue baganrangko man·esa sima ariko tariskaaha ineba u·iatangaha.
Indake a·bachengo je biapkon ro·ong bikotna dorgasto galmangiminko da·alo jegale, manderangni gue baganrangko aro nitogipa a·brirangko nisiataona sokatna am·enganiko jedakgipa cholchiba champengna nanggen ine Nokmani chawariba aganangaha.
Unbaksana Dalenggitim, Nengkong aro Emangre songrangoniko an·chengrangko simsakgija bikotanirangkoba GSU dolrang re·ange nikenagita man·angaha ine GSU Karukol Unit ni General Secretary Francis R. Marak aganangaha. GSU dolrang ia janapgimin songrangoniko an·cheng bikotaniko dontongatchina aganangaha jekon dontongatjagenchimode raka ja·kurangko de·anggen aro songsalni namgnina, Union ba a·dokni dongimin niamrangko ja·rike kamrangko ka·na nanga ineba Marak aganangaha.
