West Khasi Hills Aradonga Regional Unit-ni Association for Democracy and Empowerment (ADE) aro A·chik Holistic Awakening Movement (AHAM) dolgni nangrime niamgri koelarangko nangana batpile salruragipa garirangni kosako Aradonga police outpost-o badi ka·angaha.
Koelarangko niamgri aro nangana batpile gate salgipa truck garirang, Athiabari oni Riangdo ramagita salronganiko nikna gita man·enga jean dolongrangko aro ramarangko nosto ong·atanikoba ra·baenga ine uamang u∙iatangaha. Unbaksana niamni a·palo challan gri koelarangko salanichiba a·dokna kajina man∙a nanggnirangko bang∙en gimaanitaniko ra∙baenga ineba NGO dolrang aganangaha.
Ia biaprango check point aro check gate rango name nirokaniko dake badita manchana tangka paisa man∙anirang komienganiko, DMR aro transport departmentni official rangni niamni a·palo kam ka∙giparangni kosako kraa sastirangko on∙china aro badi ka∙dochinaba didiangaha. Ministry of Road Transport and Highways ma·mong sorkarini dongimin niamo pangchake truck gari chakka ge 6 donggipana chu∙gimik 18.5 ton aro 12 ton nigitasan gatnagita on·genchimoba dongimin niamna batpile 55 ton oni 40 ton rangnigita gate salaniko dakskaenga ine ADE aro AHAM dolrang janapataha.
Indake nangana batpile bostu gate garirangni re·ani a·selo ramarangko, nalarangko aro culvert rangko gari salanioba ojon man·jae nosto ong·atan baksana indake gari salaniara manderangna ken∙begniko ra·baaniba ong·a. Meghalaya High court, ramarangni obostarangko niroke name rakkichina aro samtangtangko ripingnagitaba a·dok sorkariko nanggipa ja∙kuko de∙nagitaba u·iatangaha. Una agreba Meghalaya a·doknigita koelarangko salruragipa garirangna challan on∙a ge·etanikoba nikuja ine Aradonga Regional Unit-ni ADE-ni President aro AHAM-ni Secretary janapangjolaha.
