South Garo Hills a·jao damsa mingsingbegipa Renang dare sambaoniko saksa social activist Greneth M. Sangma ni kragija dake ro·ong bikotna am·enganiko, Chokpot jolni nangrimgimin NGO dolrang raken jegalataniko dakataha. Ia biaponiko ro·ong bikotna Greneth Sangma song nok baksa tom·e chanchichenggija lekka pancharangko tarisruke ra·aha ine NGO dolrang parakataha.
District Forest Officer (DFO) ni bang·bata changon biapko niechenggija altuae hukum (NOC) ko pakwatani a·seloba SGH a·jao so·sojengjeng ong·rongenganiko nikna man·enga ine uamang janapangaha.
Songsalni namgnina kamko ka·enggipa aro sorkarini kosako sing·doronggipa Greneth M. Sangmako ia kragija kamrangko ka·anina NGO dolrang namnikgijaniko janapatan baksa nitogipa biapko nosto ka·na aro a·jao so·sojengjeng ong·aniko ra·baanina sing·doangaha.
GHADC-ni hukum (NOC) donggija ro·ongrangko skatang bikotna man·jawaha maina a·doko council bil donga aro Nokma a·king goreni nokgipa ong·ani gimin a·dok sorkari drae ka∙draatna bil dongja ine uamang aganangaha. NGO dolrang ia ro·ong bikotna am·enggipa kamko somoi on·mitingon dontongchina didiangaha aro manijagenchimode mikkangchi bakrime jingjengatanikoba dakanggen ine mikrakataniko on·angaha.
