TMC ni dilgipa Dr. Mukul Sangma, re·baenggipa Lok Sabha election-o Meghalaya a·doko susanasigipako jinmana skang Congress dolni parakataniara INDIA bloc-o bakrime kam ka·anirangko be·atani ong·a ine matnange aganangaha. Dr. Mukulni indake agananiara Congress-ni dilgipa Jairam Ramesh ni West Bengal a·doko TMC-ni skele dam 42 biaprango susanasigiparangko parakataniko namnikjae aganani ja·mano ong·aha. Chinga kraagita somoina sengaha aro chingni senganiko a·song gimikan niknagita man·enga ine Sangma aganangaha. Uamang INDIA Bloc-nigita bilko dondime saksa susanasigipako seokna miksongani gnang jean da·o miksongagita ong·jaha ine Sangma parakangaha.
TMC dolrangko da·alo Congress dolrang senggija skele sak 42 West Bengal o susanasigiparangko se·oke parakataha ine agangenchimode ja·pang ja·dilrango mai ong·enga uko ma·sie chanchina nanggen ine Sangma aganangaha. Congress dolrang Meghalaya a·doko susanagipa biap damgni chong·motan Shillong aro Tura donggenchimoba bimingrangko uamang mingsojahama ine Sangma singangaha.
INDIA bloc-o mikkangchakgrike saksangrik BJP baksa susaaniko dakgenchimoba chu·soknagita man·jaha indiba da·alo Trinamool Congress sak 42 susanasigiparangko Lok Sabha election-na West Bengal o seokaniko dakangaha jeon 2019 bilsioba ge·gni seat rangko Congress dolrang cheangaha.
Congress aro TMC INDIA bloc-o bakrime kam ka·genchimoba Meghalaya o seat rangko sualanio chu·soknagita man·jaha maina re·anggipa antio Congress dolrang Shillong aro Tura seat na bimingrangko mingmanaha. Re·anggipa March 8 tariko sakgni susanasigiparangni bimingrangko seokangaha jekon April-May jao ong·atnagita tarisamsogipao Shillong-ni seat-na Vincent Pala aro Tura-ni seat-o susana Saleng A. Sangmako biming mingangaha ine Sangma aganangaha.
