Common University Entrance Test (CUET) porikkako senagita Tura ni adita chatro chatrirangko gipin a·dokona porikkako sena tikatani bidingo A∙chik Conscious Holistically Integrated Krima (ACHIK) dolrang suk ong·gijaniko parakataha. Central University rango porainagita a·song gimikon sakanti chatro chatrirangna apsan cholko man·agita a·dok ge·anti aro Meghalaya a∙dokni damgittam a·jarango CUET porikkako sena centre rangko a·bachengate on·mangenchimoba, Tura ni adita chatro chatrirangko porikka sena a·jani ba a·dokni a·palchi tikataniko u·inagita man·angaha.
A·doktango ba a·jatango porikkako sechakna centre rang donggenchimoba adita chatro chatrirangko gipin centre chi jekai Dibrugarh, Tezpur, Guwahati rango tikataha ine u·inagita man·aha. Indake gipin centre ona tikataniara re·na doanio korosrangko bariatasan ong·aigija porikkako sena tarisamsoengon songreangna nangani gimin chanchisoe gisiknigita neng·nikanirangko chagrongenga ine chatro chatrirang parakangaha.
Pilak a·dokrango CUET porikkako sena chatro chatrirangna apsan cholko on·agita centre rangko songe on·anani ja·manba indake a·palchi tikataniara kragipa kam ong·ja ine ACHIK ni President Thomas Marak aganangaha. Indake ong·engon chatro chatrirangna porikkako senagita uamangni sepangbatgipa centre rangona tikatpachinagita jako ra·e kam ka·enggiparangko Marak mol·molataha.
Unbaksana sakanti chatro chatrirangna porikkako sena apsan cholrangko man·agita aro mongsongbate Turani chatro chatrirang uamangni chubata gadango poraina tarisamsoengon neng·nikanirangko chagrongaoni naljokate poraie skie ra·na cholko on·pachina ineba Marak janapangaha.
