Meghalaya a∙doko dingtang dingtang nangarangni bidingo chanchiangan baksana Meghalaya Industrial Investment Policy, Meghalaya IT/ITeS Promotion Policy, 2024 aro Meghalaya Technology Park ko a∙bachengatna Cabinet tom∙anio chanchirime ra·chakangaha.
Meghalaya a∙dokko tang∙doatna industrial aro investment policy ba karkana aro kajina man·anirangko baridapatna, a∙doko karkanarangko rike tang∙doatna, samtangtango donggipa gam jinko bikote bading chiwalani cholrangko bikote a∙dokni chu·gimik tang·doanina chanchirimangaha. Ma·mong sorkarini gital industrial policy baksa a·dok sorkarini tarigimin policy ba apsan ong·e man·gnirangko bariatnagita man·anggen.
Meghalaya a∙doko IT/ITeS Promotion Policy ko ra∙baaniara tangka paisarangko jakkalsona on·giparangko salna aro a·doko songdongenggipa manderangna kamrangko nakatatna dakchakani ong·anggen. Technology Parks Society ko a∙bachengatanichi a∙dok sorkari dingtang dingtang a∙dokni bakrango apsan dakgipa technology park rangko bikote ICT aro Electronics unit rangna tangkarangko salna aro gital kamko bikotna chol ong∙anggen jeon Tura IT Park ko riknagitade tender rangko on·manaha ine u·iatangaha.
Unbaksana jabolrangko name chimonge galna aro soe bon·gipa aro bon·gijagipa jabolrangko dingtang done mikkangchi jakkaltaina man·agita EGH a·jani Rongakgre songoniko a·a brena janapanikoba ra·chakangan baksana Meghalaya Urban Affairs Service (Gazetted) Rules 2024 aro Meghalaya Co-operative Service Rules, 2023 ni niamrangko namdapate tarianikoba Cabinet ra·chakangaha.
Una agreba State Disaster Response Fund (SDRF) ni ning·o chio sripe a∙sel ong·e sigiparangna tangka paisachi dakchakaniko on∙a aro RDSS scheme ni ning·o songadamrango bijoliko man·a nangkuenggipa songrangko matchote kamko ka·nagitaba Cabinet ra∙chakangaha.
