North Garo Hills-o guerangko ge·e game cha·giparangoniko niamgri tangka paisarangko gilanina Rongrong-ni MDC Rinaldo Sangma Deputy Commissioner-na chitti sedoata. Bang·a guerangko game ge·e cha·enggiparang aro bading chiwalgiparangoniko niamgri kajina gilanirangna suk ong·gija MDC o re·bae janapanirangko ua man·soaha ine Sangma parakanga. NGH a·jani ning·o Resubelpara Municipal Board aro dingtang dingtang dolrangba gueko badinggiparangoniko kajina gile cha·enga ine Sangma u·iatangaha.
Garo Hills Autonomous Council ni dongimin niamni gitade gipin a·dokni sorkarini department ba Municipal Board rang gue badinggiparangoniko aro joltango ge·e game cha·enggiparangoniko kajina rangko ra·na gita bil man·ja ine MDC parakangaha. Cholgrigipa ge·e game cha·giparang niamni a·palo bading chiwalani a·selo neng·nikarangko cha·grongna nangao ga·akenga. Ia bilsio uamang gue bostasako gong 3500 nasan palna nangenga ine Sangma u·iatangaha. North Garo Hills-o songdongenggipa aro ge·e game cha·gipa manderangni namgnina ia obostarangni bidingo tarake nirokate kam ka·china Sangma mol·molangaha.
