2019 bilsio parliament-o Citizenship Amendment Act (CAA) ko ra·gatna parakatani bilsi bongani ja·mano, ma·mong sorkari bon·kame chu·gimik ra·gataniko dakangaha. Indake ong·genchimoba Sixth Schedule ni ning·o ga·akgipa Northeast-ni a·dokrang jekai Meghalaya, Assam, Tripura, Mizoram aro Inner Line Permit (ILP) man·gipa Arunachal Pradesh, Nagaland aro Manipur a∙dokrangko CAA ra∙gataniko changalangskaaha.
Ma·mong sorkarini CAA ko ra·gatna miksonganiko parakata bakan bang·a biaprango jingjengatanirangko nikna man·angaha. Ua somoirango adita manderang janggirangkoba gimaataona sokaha. Apsandaken ia changoba Assam a·dokni United Opposition Forum Assam (UOFA) ni bakrimgimin ge 16 dolrang, ma·mong sorkarini kamko namnikjae jegale jingjengataniko dakangenga.
Home Minister Amit Shah, CAA ko ra·gataniko parakataha jeon ua Hindu, Jain, Christian, Sikh, Buddhist aro Parsis toromnigita Pakistan, Afghanistan aro Bangladesh a·songrangoni India a∙songona 2014 bilsini December 31 tariko ba una skang sokbagiparangna Indiao songdongna dakchakanggen ine aganangaha.
