Batanggimin salrangna skang Post Graduate CUET porikkako senagita adita chatro chatrirangko gipin a·dokona tikatani bidingo sing·anina Education Minister Rakkam Sangma adita talatanirangko on·angaha. National Testing Agency (NTA) ni u·iatanigitade, PG CUET porikkako sechakna a·dokni damgni biaprango chong·motan Shillong aro Tura kosan janapkuenga ine Sangma aganchakangaha. A·dokni chatro chatrirangko CUET porikkako sena a·palchi tikataniko ua name ma·sikuja aro badita sakko gipin a·dokona tikataha uko name u·ikuja ineba Sangma aganangaha.
Da·o dipetde NTA a·dok sorkari baksa name agangolpogrikuja aro porikkako sechakna badia skul ba collegerangko centre daknasiengani bidingoba name tik ka·e agana dongkuja ine Sangma u·iatangaha. Indake ong·engon koborrangko man·soanigitade ia chango bang·gija chatro chatrirangkosan porikkako sena gipin a·dokona tikataha aro iara a·dokni damgni centre rango porikkako sechakna computer rang chu·ongmanjani gimin ong·naba donga ine Sangma aganangaha.
Bon·kame indakgipa obostarangko chagrongengon chatro chatrirangko gipin adokona tikatako man·giparang bang·genchimode aro neng·nikanirang donggenchimode sakantina apsan cholko on·a man·agita nanggipa ja·kurangko de·e iani bidingo jotton ka·e kamrangko ka·anggen ine Sangma agandapangaha. Una agreba PG CUET porikkako seani bidingo NTA ni Chairman ko a·dok sorkari baksa name agangolpogrikna mol·molataha ineba Sangma janapangaha.
