Turao poraienggipa chatro chatrirang UG Central University Entrance Test (CUET) porikkako sena gamgimin paisarangko Tura super market ni dokan number 218 Aritrika Cyber Zone ko chalaigipa gamgija donaha ine GSU, CEC HQ Tura koborna parakataha. Namedake sing·sandiani ja·mano, chatro chatrirang CUET form o nanggipa gapatanirangko aro gamna nanganirangko on·manahaoba dokan nokgipa gamjaha ine u·inagita man·aha.
Chatro chatrirang ia a·selo ga·ake bilsisako indinari gimaataona sokaha aro chubata gadango poraina miksongenggiparang indakgipa obosta ong·gniko chanchisojagenchimoba neng·nikaniko ra·baaha ine GSU dolrang aganangaha. Ia ong·a obostani bidingo uamang chatro chatrirangni namgnina dokanko chipataha aro kobor on·kuja dipet kulijachina beng·e donaha. Uamangni beng·ako manigjja kulidragenchimode GSU CEC rakbata ja·kurangko de·anggen ine u·iataha.
