Da·al salni bako WGH Tura, District Auditorium o CM-Elevate programko Government of Meghalaya, Prime Meghalaya, Department of Agriculture, MBMA, Meghalaya Tourism, IFAD, Animal Husbandry aro Veterinary Department nangrime ong·atangaha. Ia tom·bimonganiona a·dokni CM Conrad K. Sangma mongsonggipa sokgipa ong·e sokbaan baksana Turani MP Agatha K. Sangma, PHE Minister Marcuise N. Marak, Deputy Speaker Timothy D. Shira, Rongjengni MLA Jim M. Sangma, WGH a·jani Deputy Commissioner Jagdish Chelani, Turani SP Abraham Sangma, TMB ni Chairman J.D. Sangma aro gipin dilgiparang sokbae bakko ra·angaha.
Ia programo a·dokni Chief Minister uni dal·begipa miksongani chongmotan Meghalaya a·dokko 10 Billion Dollar economy ong·atna miksonge kam ka·engani bidingo aganangaha. A·dokko miksonggimin gadangona sokatna namen rakbegipa kam ong·a aro iako chusokatna a·doko koros ka·gipa tangkako, rika cho·anirangko aro entrepreneur-ni a·bao bilsi prako Lakh 5 kamrangko bikotan baksana dal·dalgipa business rangko a·bachengatanichisa chu·sokatna amgen ine Chief Minister aganangaha.
CM Elevate nigita da∙alo sak 621 manderangna Agri-Response Vehicle, Agri-Warehouse, Common Facility Centre, wak-do∙o aro do∙bok jilla kaani schemerangko suale on∙angaha. Una agreba Floriculture Mission-nigitaba dingtang dingtang award ba boksisrangko on∙angan baksana CM-Connect na Village Data Volunteers na seoka man∙gipa manderangna appointment letterrangkoba sualangjolaha. Unbaksana battanggimin somoio Tura IT Park-ko tarina work order rangko on·aniko janapangan baksana North Garo Hills Mendipathar o Pepsi Company ni karkanako riknasienganikoba CM janapangaha.
Ia programni bako Tura songjinmani Rongkhon Songgital gittimo donggipa jabol galchakenggipa a·damo donggipa hajal 50 metric tonne jabolrangko, Bio-mining technologyko jakkalenba dingtang dingtang bosturangko tarie jakkaltaitaina man·agita miksongenggipa kamnaba Company ni work order ko TMB na on·angaha.
