Williamnagar-ni Niksamso Garo Community Organization (NGCO) dolrang, Premson Ch. Marak minggipa mande saksani kragijagipa kamrangko ka·enga ine jangenggipa aro an·tangko NGCO dolni member ine tol·e agananiko da·al salo raken jegalataha. Premson minggipa mande NGCO ni ong·chongmotja aro uamangni dolo maming bako donggipaba ong·ja ine Williamnagar NGCO dolni Vice-President Dimchang Dwarka M. Sangma u·iatangaha.
Dawa Songgitalgre o low cost ni nokrangko rikanio kam ka·enggipa manderangoniko, Premson an·tangko NGCO dolni mande ine togie tangka paisarangko dabie ra·rongengani koborko uamang man·soaha ine Sangma janapataha. Indake an·tangko NGCO ni member ine togie kragijagipa kamrangko ka·anio uamang jak dongja aro jako ra·e dilenggiparang ua mandeni kosako kragipa sastiko on·chinaba didiangaha.
Unbaksana Premson ni kragijagipa kamrangko ka·anina kakket bichalona ra·bana sandirikitanirangko dakanioba NGCO jakko on·e kamko ka·anggen ine Sangma parakataha. NGCO ge·sa tangkana dakgipa dol ong·ja jean Meghalaya ni A·chikrangni namgnina, kakket bichalko ra·bana aro songsalo chu·gimik tang·doanina kam ka·enggipasa ong·a ineba Sangma aganangaha.
