West Garo Hills, Tura ni District Urban Planner ni tarigimin Tura Draft Master Plan 2015-35 ni kosako council-ni pilak MDC rang jegalaniko dake chanchirimna da∙alo special session ko GHADC o ong∙atangaha. A·king Nokmani a·arangko Municipality na pakwataniara Sixth Schedule o pangchake bil donggiparangkoba nosto ka∙ani ong∙gen aro Nokmarangni bilko mikkangchi gimaataona sokatgen ine CEM Albinush Marak aganangaha. Indake ong·genchimode Nokma a·kingo songdongenggipa manderangna bang·a neng·nikanirangko ra·bagen aro dingtang dingtang kajina gamanirangkoba on∙a nanggenok ine Marak agandapangaha.
Ia plan ni ning·o A·king Nokmani a·arango ga·akgipa dam 7 songrangara Duragre, Chasingre, Rongkhongre, Alotgre, Ballongre, Danakgre aro Doldegre ong·a jekon Municipality ni jako ra∙e kamrangko ka∙genchimode bang∙a neng∙nikanirangko ra∙bagen ine Deputy CEM Nikman Marak aganangskaaha. Iani bidingo ua songrangni Nokmarang an∙tangtangni namnikgijaniko parakate chittikoba on∙angaha ine Marak u∙iatangaha. Indake Municipality ni Nokma A·kingrangko bariataniara Constitution ni Article 243 ZC ko pe·ani ong·a aro ia niamgri a∙ako a∙kangna am·enganiko GHADC ni pilak MDC rangan bakrime jegalangenga ineba Marak janapangaha.
