National Cricket Academy, U-16 me·asa dolni Zonal Cricket Academy (ZCA) camp ong·nasienggipao bakko ra·na BCCI ni All Indian Junior Selection Committee, Meghalaya Cricket Association (MCA) ni sakgittam chadambe cricket kal·giparangko seokangaha. Seokako man·giparangara Apandanka Marak, Gaurav Jyoti Thakuria aro Dipayan Nandi ko batanggimin chango ong·anggipa U-16 me·asa dolni Vijay Merchant Trophy o name kal·aniko nigrike seokangaha jeon Meghalaya dol plate group o gnigipa ong·e matchotaha. ZCA camp ko re·baenggipa April 19 oni May 15 tarikona ong·atangenga jekon Surat, Cuttack aro Jaipur-o sokachakanggen.
Apandanka Marak changsni kal·a gimiko robol goanio wicket ra·batgiparangoni gittamgipa gadangona sokdoangaha. Uni average chu·gimik 10.77 aro strike rate 23.10 mang ong·a. Apsandaken Gaurav Jyoti Thakuria-ba changsni kal·anio sak 31 wicketrangko ra·angaha jeon uni average 14.77 aro strike rate 23.35 ona ga·dapeaha. Dipayan Nandi chang 4 half century rangko doke kal·a gimiko 393 runrangko man·angskaaha aro kal·a gimiko gadang 30 gipani biapko man·e dongenga.
