Da·al salo a∙dok gimikna Talent Identification Programni gittamgipa Phase aro Elite Pathway Programni gnigipa Phase ko Shillong songjinmao a·bachengate on·angaha. Ia programona Chief Minister Conrad Sangma, Bollywood o jawilwat kal·gipa John Abraham, Meghalaya State Olympic Association (MSOA) ni Working President John F. Kharshiing, a·jani DC aro gipin officialrang dongpae bakko raoangaha.
Talent Identification Programko dingtangmancha a·dokni chadamberangni changa sapanirangko ma·sina man·a aro tang·doatnagita namgipa ranta ka·anirangko dakate mikkangchina tarisamsona miksonge ra·bagipa ong·a. Apsan daken Elite Pathway Programba ru·utbea bilsirangonin chadamberangna dingtang dingtang kal·anirangko skie on·enggipa ong·a.
Unbaksana a·dokni palo dingtang dingtang kal·susaanirango bakko ra·e chegiparangna, tangka paisanigita dakchakna Meghalaya Sports Scholarship Scheme ko a·bachengate scholarship letter rangkoba sualangaha. Ia scholarshipko uamangni kal·susaanio badita medalrangko man·ao pangchake japrako 6000 oni 8000 ona scholarshipko on·anggen ine Chief Minister parakataha.
