NEHU Tura campus-o Mera Bharat Yuva aro Agri Export ni bidingo Agriculture & Processed Food Products Export Development Authority (APEDA) ni kam ka·anirangko poraienggipa chatro chatrirangna capacity building programko mijal salo ong·atangaha.
Ia programko APEDA Regional Office Guwahati, Agri Business Management & Food Technology (ABMFT) aro NSS PG Unit Tura, NEHU Tura campus bakrime dakdilangaha. Ia pogramona dingtang dingtang department-o poraienggipa sak 100 mang chatro chatrirang bako ra·angtokaha aro uamang My Bharat Portal-oba an·tangtangni bimingko segate ra·angjolaha.
ABMFT ni HoD, Prof. Deepak Bhagat rimchaksoani kattarangko aganange, My Bharat Portalni gamchataniko talatangaha. Bidyut Baruah, APEDA Guwahati Regional Office ni DGM cum Regional Head, APEDA ni chu·sokani, gamchatani aro kamrangni bidingo North-East a·dokrangko mongsongbate ra·e aganangaha. APEDA ni kam ka·ani bidingo APEDA Regional Office ni Business Development Management, Md. Ashraf Kamal aganangskaaha. Ia programona NEHU Tura campusoni bang·a departmentrangni HoD rang aro gipin skigiparangba re·bae bakko ra·angtokaha.
