Da·al salo Rongram antidamo World Consumer Rights Day ko District Legal Services Authority (DLSA) ni ong·atanichi maniangaha. Consumer Rights Day ko maniani bako Tura DLSA ni Legal Aid Counsel Grangchira Ch. Marak, Consumer Rights Protection Act, 2019 ni gamchataniko agantalatangengon, ia Act o pangchake consumer ba bree jakkalgipa manderangna uamangni agana bil gnangani aro naljokaniko on·an baksana court chi re·ange mokordoma ka·anirangko dongimin somoigita matchote on·a amaniko talatangaha.
Tura Deputy Commissioner Office ni District Consumer Court o niamni a·palo badinggiparangni kosako badi ka·na man·a amani bidingo tom·anio bak ra∙gipa manderangna Marak aganangaha. Una agreba tangka paisanigita neng·nikaniko man·e ukil rim·na man·gijagiparangnaba, National Legal Services Authority (NALSA) nigita tangka nanggija ukilrangko rim·e mokordoma ka·anio dakchakaniko man·a amanikoba Marak janapangjolaha.
