Tura Civil Hospital o Cardiac Catheterization Lab, Trauma Centre aro Opioid Substitution Therapy (OST) Center-ko MP Agatha Sangma mongsonggipa sokgipa ong·e nokdonggae on·angaha. Programona West Garo Hills a·jani DC Jagdish Chelani, Tura Civil Hospital ni Superintendent cum Jt. DHS, Dr. I.C. Marak, Garo Hills Division ni Jt. Director Dr. Ivory Sangma, Tura Mothers Union ni member rang, hospitalo kam ka·giparang aro nurse rangba re·bae bakko ra·angaha.
Tura Civil Hospital ni Superintendent cum Jt. DHS, Dr. I.C. Marak, ia Cath Lab, Trauma Centre aro OST Centerko man·anichi sanna bannanio bilongen dal·begipa dakchakani ong·a ine aganangaha. Ia kolrangchi opium ba drugs rangko jakkalaona soke sanna bannaniko nangenggiparangna gamchatbegipa ong·anggen ine Marak parakangaha. Heart attack aro ka·tongo a·kol donge sagipa ka·tongni sabisirangkoba da·o sannagita man·genok ine Marak talatangaha.
Programo aganengon MP Agatha K. Sangma, Tura Civil Hospitalona ia gitalgipa sannani kolrangko ra·bana kam ka·gipa pilak dilgiparang, health department, doctor rang aro Chief Minister Conrad Sangma koba mittelangaha. Da·oni somoio pekatgipa bosturangko jakkale aro ka·tong sagitike banga manderangan neng·nikaona sokenga aro ia sannani cholrangko man·anichi Garo Hills o songdongenggiparangna dakchakani ong·gen ine Sangma agandapangaha.
