Amak ki∙sang doktopana chasinapainabe!
Jani jakpa ripripana jak songdonabe!
Dosi galgen ja∙man-ja∙wil chipu diabolkosa,
Ja∙gatango nanggen, ja∙chingtangan bu∙gen
Hai mikraknajok apadrangai!
Noti dari ropode ka∙tong noknapataibo,
Chawari nokkromnade mandekosa chekbo.
Do∙bimani rotrota knasengbatakosa,
Dimchang do∙mesal gisikwata ku∙tengakosa,
Hai baserimbojok amadrangai!
Nikomkome re∙nabe ramatongtong niat’
Ki∙sangchiko nipile mikkangchipak an∙pilat’
Ketchi samtangtang ramako nie re∙rim,
Ja∙gitdote ga∙akode na∙an saknagen.
Hai gisik rakbone angjongdrangai!
Bokbegipa lekkao ramram kali tototdapon
Mohor su∙kama gandasa nanggo!
Kimitgalna amjaha sonan’ rong pil·aiaha.
Ha uarang! Maikaisa ong∙aha?
Hai simrakrimbojok anodrangai!
Bol kirosikoha krong bilbang kipna,
Wa∙a wa∙sa wa∙sako paksam dim∙na.
Sone japjap dona nio nitopakan
Kimbik am∙pang chatesa mikka badriaona.
Hai krimkro kamko ka∙rim!
Nang∙ni chekiosa asintakba gaengjok
Gipin koksi ning∙osa na∙tokkode donsretjok,
Duk man∙gipa chekki, rasong chagipa koksi
Ang∙ke al·aringkosan angnade pattijok!
Hmm gose man∙atangko chu∙ongnikaijok!
Dikdiksa chadenge sko rim·bo.
Sako matnanggen ambino?
Salbonga somoi ra∙e chanchibo,
Gisik mikta naakosa seoktokbo.
Hai mikraknajok!
