North Garo Hills Resubelparani ning·o Khaldang Babupara-oni Khaldang Songmaona re·gipa, Khaldang Rongsrek gita rama tarianggipa jean 3.30 KM ong·gipa ramani bidingo PWD Office ona re·ange songdongenggipa manderang mongsongbate village road committee rang badi ka·e jinma soi ka·grike Executive Engineer na chittiko ko on·angaha. Khaldang Babupara oni Khaldang Songmaona dakanggipa ramani bon·kamgipa work orderko 25/06/2021 tarikon chamatmane ja 24 o matchote on·china PWD Office ni sanction order-o janapani kattarang gnangchim ine uamang janapataha.
Metalling aro blacktopping-na gong 1,45,00,000 crore tangkarangko chamatmangenchim ong·oba, da·alona kingkingba ia ramako matchotgija galchipe donenga ine Rongsrek songni Road committee rangni janapanio u·inagita man·angaha. Ramako tarienggipa biaprang neng·nika gri tarina man·aigipa aro mongsonggipa ramaoni bang·e ning·tue napangna nanggipa biapba ong·jachim ine uamang janapataha. Indake ong·engon maidakgipa neng·nikaniko man∙e indita bilsi tarigenchimoba da·alona kingkingba matchote on·a man·kujaenga ine songdongenggipa manderang singdo·anirangko dakangaha.
Ramarangko tarigija galchipe donengani a·selo songdongenggipa manderangna bang·a neng∙nikanirangko on·an baksana salanti re·ruraenggipa skul bi∙sarangnaba wachi karini somoio bilonggen neng·nikanirangko on·rongenga ineba songni manderang janapatjolaha. Unbaksana indake a·dok chigani silroro namroroanina chamatgipa scheme ba kamrangko somoigita matchotate on·gijaniara songdonggipa manderangnasan ong·aigija, a·dokko chalaigipa skotong dilgiparangkoba chonike roagita chacha ong·a ine uamang aganangaha. Indakgipa obostarangko chagrongengon a·dokni skotong dilgiparang kamrangko ta·rake nirokatpachina songni manderang mol·mole chittio janapataha.
