WGH sima ari jolni a·arangko cho·e Assam a·dokchina salangarangko nike Tikrikilla jolni NGCO aro gipin bakrimgimin NGO rang jekai ASPF, AAPE, CEPARD dolrang am·sandianiko dake ia a·arangko Assam ni mandena palmanaha ine koborna u·iataha. Garo Hills ni ning·o donggipa a·arangko gipin jatrangna pale cha·ani a·selo a·a pattarangko tarisruke a·arangko Assam a·doko napate kangdrae ra·anikoba rim·a man·angaha ine NGO dolrang parakataha.
Garo Hills ni a·a chiarangko Assam o songdongenggipa manderangni a·kange ra·aniko uamang nie dongjawa aro sima ari jolo a·arangko rorirangna palgiparangko rim·a man·ode biaponiko a·rikgalgen ine NGO dolrang raken mikrakataniko dakataha. A·kawe jolrango gipin Jatrangna a·a pattarangko on·jachina aro mondolrangkoba patta tarina skatang bil on·aniko dakjachina GHADC ni skotong ong·e dilenggiparangko uamang didiataha. Garo Hills ni sima arirango ong·enggipa obostarangko nirokjani a·selo niamgri napdrae songdong a·chaenggipa manderangko niamgita sandie kamrangko ka·chinaba uamang didiataha.
