SWGH Ampati o, District Sport Office, Executive Engineer aro Public Health Engineering department bakrime World Water Day Run ko ong·atangaha. Ia katataniko, dingtangmancha chiko ripingna nangani gamchataniko aro songsalo rongtal an·tale dongani bidingo mikrakataniko on·a miksonge ong·atangaha. Ia 10 km mang chel·gipa ramao katataniko, Ampati Indoor Stadium oni a·bachengataha jeon a·jani sak 138 mang manderang gisiko nange bakko ra·angaha.
Me·asarangni gisepo susaanio, Damalgre songoni Mirest R. Marak, 17 minute 16 second somoikosan nange bilakbee katanichi skanggipa ong·aha. Jaluagre songoni Laichang T. Sangma, 18 minute 12 second somoio matchote gnigipa gadangko man·angaha. Bongpara songoni Kanen M. Sangma, 18 minute 19 second somoio matchote gittamgipa biapko man·angskaaha.
Apsandaken me·chikrangni gisepoba Damalgre songoni Dimchi Ch. Marak, 24 minute 6 second somoio matchote skanggipa ong·aha. Chigitchakgre songoni Ringsechimik G. Sangma, 26 minute 13 second somoio kataniko matchote gnigipako man·angaha aro gittamgipa gadangko Asinagre songoni Rikmatchi G. Sangma, 26 minute 24 second o matchotskaaha.
Pilak bakko ra·anggipa sak manderang an·tangtangni bilak wa·saaniko jakkale aro sports ni kakketgipa gun o dakmesoke gisiko nange katsusaangaha.
