Ma·mong sorkarini ra·gatgimin Common University Entrance Test (CUET) porikka ra·aoniko a·dokni Undergraduate (UG) course ko porainasienggipa chatro chatrirangna ia 2024 bilsi mangmangode napatpakujachinagita A·chik Conscious Holistically Integrated Krima (ACHIK) dolrang skotong Minister Conrad Sangma na chittiko see didiataha. Ia CUET porikkako ra·ani miksonganiara India a·songni Central University rango porainasienggiparangna admission ra·na porikka ra·e baseani ong·a jekon re·anggipa February 27 tarikoni a·bachengataha.
CUET porikkako ra·gatgenchimoba a·doko songdonggiparangni kri, skie ra·anio dingtanggrikanirang donga aro songadamrango songdonggipa chatro chatrirangna namen neng·nikani ong·a maina uamang chu·ongagita tarisamsona cholko man·paja ine ACHIK dol janapataha. Indake ong·engon skotong Minister ko iani bidingo agangrikanirangko dake, CUET porikka sena nanganiko ia bilsikode donpakuchina jedakode chubata gadango poraianio chatro chatrirangna nambatgipa aro apsan cholrangko man·a amgen ine ACHIK dolrang didiangaha.
Indakgipa Central ni porikkarangko ra·gataniara Chatro chatri sakantinan apsan cholko on·anirangko ra·one adita chatro chatrirangkosan seokani bidingo jera ra·anirang batrikrikenga ine ACHIK dolni President Thomas M. Marak aganangaha. Una agreba CUET porikkako ra·anio dingtang dingtang jatni daka rikanirangko aro skie ra·anio chagronggipa neng·nikanirangko kraagita ma·sichakani dongjan baksana MBOSE ni syllabus baksa name bakrimna melibreja aro porikka sechakram biaprangba chu·ongja ine Marak aganangaha. Indakgipa obostarangko chagrongna nangani a·selo iani bidingo nanggipa ja·kurangko de·e a·dokni chatro chatrirang jemaangan UG course ko porainasienggiparangni namgnina ACHIK dolrang skotong Minister ko didiangaha.
