NEHU Tura campus-o batanggimin bilsirangonin Student Union-na election-ko ong·atkujaengani gimin ta·rakale ong·atchina Vice Chancellor, Prof. Shukla na NEHUSU ni President jinmani palo mol·mole chittiko on·angaha. Da·o dipet NEHU Tura campus Student Union gri ong·e dongenga. Poraienggipa chatro chatrirangni nanganirangko chu·sokatna aro neng·nikanirangko naljokatna ta·rakale kamrangko a·bachenge election-ko ong·atchina Dean Student Welfare (DSW) ko didiangaha.
NEHU Tura ni VC Prof. Shukla uamangna aganengon, University-o ge·sa Student Union san dongna man·aia ine parakangaha. Indake ong·genchimoba, ua daitorangni bidingo aro kamrangko campus ge·gnion sualgrikna nanggen ine aganangaha. Biap damgnio dingtanggrikanirang dongani a·sel, iani bidingo ja·kurangko de·na gital chanchianggen ine Shukla parakangaha.
NEHU Tura campus-o da·o dipet chatro chatrirangni kamrangko administration sa ka·enga jekon niamgitade chatro chatrirangsa dakna nangao ga·aka ine uamang u·iatangaha. Unbaksana election-ko ong·atkujana kingking, re·baenggipa NEHU Tura campus ni varsity week aro gipin programrangko student council chu·gimik jako ra·e kam ka·anggen ine parakangaha. NEHUSU election-ko ong·atna skangba interim body ko tarichengchinaba uamang mol·molangjolaha.
Campus ge·gnio student union ni bidingo gital niamrangko taritaina chanchirimnagita committee ko a·bachengatgen ine VC Prof. Shukla parakataha. NEHU, Shillong aro Tura campus na, NEHUSU ge·sa official Student Union ong·gen aro kamrangko campus ge·gnini gisepo sualgrikgen ine VC parakangaha.
