A·chik Literature Society ni Department of Garo, NEHU Tura Campus aro Department of Garo, Don Bosco College, Tura baksa nangrime Regional Workshop on Traditional Musical Instruments and Performing Arts-ko sal bongana University ning·o ong·atgipa Workshop March 22 tariko Valedictory function ong·e matchotataha. Ia programko ALS ni Executive Member Basan R. Marak chi dilangaha.
Workshop-o mongsonggipa sokgipa Iris Watre Thomas jean saksa niksenggipa git ringgipa aro jatni doka-damani bidingo u·igipani aganengon, uni sandie man·anio chigringko name tarie dingtang dingtang gam·ani key-rango dokna man·aniko aganaha. Wangala chrokani mingprakna dama dokani rokom ming sotbri rokomna bate donga ine ua aganangaha. Chadamderang gisik nange jatni doka-damani aro ring·anirangko skie ra·e an·tangtangna music band-rangko bikote jatko niksengatchina ua didiaha.
Dingtang mancha okamako man·e re·bagipa Mikhail Ch. Marak ni agananio, ua an·tangni git aro musicko tarianio A·chik jatni doka-damaniko aro sulrangko nakatatna jotton ka·enganiko aganaha. Ua jatni doka damanio gamaniko nambate nakatatna tarina man·ode aro standardize ka·na man·ode namgen ine aganaha.
A·chik jatni man·rikbagimin doka-damaniko tarigiparang komianganiko Chimik magazine-ni Editor Melky Chisim agane, uarangko ripingna workshop ona skie ra·na re∙bagiparangko didiangaha. Ua A·chikrangni dama bolko konge uko de·tome dokna man·e tarianio a·gilsako damarangoni robatsranggiparangoni rokomsa ong·genkon ineba aganaha. Ua wa·aniko tarigipa gongminakoba doke mesoke, mikkangchi wa·ani aro silni gongminako niksengbate jakkalangchina didiaha.
Prof. Fameline K. Marakni agananio, workshop-o skie ra·giparang an·tangtangni changa-sapaniko sakgipinrangna skie on·skachina didiaha.
Dr. Colnat B. Marak, Vice-President, ALS-ni agananio, chadamberang ning·tubate jattangni gimin skie ra·e, chubate poraie jatni chrokani, doka damanikoba nambate tarina aro niksengatna aganaha.
Dr. Crystal Cornelious D. Marak, Secretary, ALS, workshop-ona sokbagiparangko rimchaksoaniko agananio, ia workshop-ko ong·atanichi jatni minga-ring·ani aro doka-damaniko skie on·anirang A·chikkuko Eight Schedule Indiani Constitution-o napatna dabianio mangrakbatata ine janapaha.
Workshop-o skie on·giparangoni Dewal M. Sangma chigringko a·ning chiningchiniko ra·gatdobaani doroe mesokaha aro Ringjeng T. Sangma sarendachi “Nanggorere Goserong” aro “Sonatchi Khalsin”-ni gitni sulko sale mesokaha. Sakgipin dama aro grikako skie on·giparang Dirot Ch. Marak, Pa Dewal M. Sangma, aro Chingchak T. Sangma dama bol gittamko apsan doke “Jajong Mikka Simdapa” aro gipin rokomo dama dokani ja∙kurangko mesokangaha.
Workshop-o bak ra·giparang chigringrangko doke “Dimdimdimchong” gitko knatoe ring·e mesokangaha. Bak ra·giparangoni Mr Mario Attamrik R. Marak, bangsichi Jenden Ch. Marakni git “Do·rimitko Nikoba” ni sulko sike jinmako an·saoataha. Workshop-o donggiparang, Wangala chrokaniko uamangni skie ra·giminoniko dama, bangsi, adilko jakkale grika baksa chroke mesokangaha. Bakko ra·giparangoni sakgittam uamangni grikako skie ra·giminko jinma mesokangaha. Ia workshop-o skigiparangna aro bakko ra·giparangna mongsonggipa sokgipa Iris Wa·tre Thomas aro dingtang okamako man·gipa Mikhail Ch. Marak, Tura Don Bosco College ni Head of Department, Nicholas M. Sangma aro ALS ni Executive memberrangni jakchi certificate-rangko on·aha.
