Garo Hills Autonomous District Council o kam ka·giparang bang·batan an·tangtangni bari bagano nok rike nok para on·e cha·e, Council ni quarter-o dongpilskaanina Human Rights and Anti Corruption Youth Power of India (HR&ACYPI) suk ong·gijaniko rake jegalataniko dakangaha.
Indake ong·engon Council o kam ka·enggipa kangal cholgri aro segri pagrirang donggenchimoba uamang dongchakani office quarterkoba man·jaenga aro a·dok sorkarini ning·o kam ka·an baksana uni kosako jikgipa Council o kam ka·e noktangko para on·pile Council ni quarter o dongketaniko nike kangal rangni mipal ko cha·sekagitasan ong·aia ine HR&ACYPI ni dilgiparang aganangaha.
Council o kam ka·gipa nokgri jamgri dormaha man·gija donggiparangan Council o quarter-ko man·gijani gisepon, State Taxation Department aro Police Department rangni manderangsa Council ni quarter o dongna man·skaenganina Council ni MDC rangko sing·sandianirangko dakangenga ine Human Rights and Anti Corruption Youth Power of India ni dilgiparang parakataha. Mikkang nitee dakgenchim ong·ode ian jatko dilsretani aro kangalrangko kal·stekanigitasa ong·enga ineba agandapangaha.
