A·dokni gitcham Skotong Minister aro TMC dolni dilgipa Dr. Mukul Sangma Lok Sabha election ni ja·mano BJP dolo napgen ine Meghalaya Pradesh Congress Committee (MPCC) ni President Vincent H. Pala parakataha. Dr. Mukul Sangma baksa Pala ni Congress ona re·bapilani gimin golpogrikaniko dakon ua jechakaha aro uni BJP dolo napna nangnikaniko nikna man∙aha ine aganangaha.
Congress ni dilgiparang Dr. Mukul Sangma ko Congress dolona re·bapilchina gita mol·molaha aro re·bapilna sikjagenchimoba TMC o donge apsan dolgni bakrime Lok Sabha election-o kam ka·na ku·mongenchimoba Sangma an∙tangan Congress-ni manderangko rope BJP-o napatna jotton ka·skaenga ine Pala aganangaha. Dr. Mukul Sangma aro uni dol dingtangmancha Ri-Bhoi a·jani bang·a gital manderangko BJP o napatenga. Iarangko nikesa a·doko Congress, TMC baksa bakrimna jechakaha ine Pala matnangataha.
TMC ni dilgiparang bang·a somoirangon BJP baksa chanchirimaniko dake apsan bakrimani kattarang dongaha ine Pala kobor ra∙timgiparangna parakataha. Iani sakkirangko election-ni ja·mano parakgen aro bang·a TMC ni dilgiparang BJP-o napanggen. Uni gimin uamang TMC baksa bakrmjana chanchiaha maina TMC dolara BJP ni ge∙gipin dol ong·a. TMC a·doko niksenggipa dol ong·ja aro bang∙e ru·ute bainagipa party ong∙ja ine aganan baksana uamang baksa bakrimna skangan BJP ming bakrimna ja∙ku deani a·selko ma·sia ineba Pala aganangaha.
