Lok Sabha election o BJP dolni NPP na chakpaaniko on·a ja·ku de·aniko, changsatai nipiltaichina Meghalaya a·dokni bang·a dilgiparang aro kam ka·giparang, party ni state President Rikman Momin na janapate ma·mongni dilgiparangko mol·molgenchimoba namgni gri ong·aiaha ine parakataha. Iani bidingo Momin ma·mongni dilgiparangna janapaton maming dingtangatna ku·rachakaniko on·jaha ine parakataha.
BJP ni mongsonggipa ong·e Meghalaya a∙dokko nirokenggipa, Chuba Ao ni agananigitade, 1991 bilsio BJP ni Meghalaya-ona napaonin Lok Sabha election-o ge·sa seat-koba chena man∙kuja aro iarangko nike NPP na chakpana tik ka·angaha. Unbaksana dilgiparangni gisepgriko dingtange chanchiani aro chakpana sikgijanirangaara adita somoirangnasan ong·aigen ineba Ao aganangaha.
Indake meligrikgijanirang ong·engon saksa ba sakgni dilgiparangsan BJP doloni ong·katnaba donga aro uamangni ong·kataniara BJP dolna maming neng·nikanirangko ra·bajawa ine President Rikman Momin aganangskaaha.
