Da·al pringni bako Garobadha-ni ning·o ong·gipa Harigaon songo, mande saksako Mongma kal·ake so·otaha ine songni manderang kobor ra·timgiparangna parakataha. Kal·akako man·e sianggipa mandeara Harigaon Mukdangra ni bilsi 50 ong·gipa Abing D. Marak ong·a.
Ia obostao chagrongna nangani mongsonggipa a·selara, uamangni songona napbagipa buringoni Mongmako nike, manderang Mongmako jachipchang ra·na ine sepangona re·angani gimin ong·aha. Manderangni Mongma sepangona re·ange hala ka·ani a·selo, Mongma mande jinmako rikruruna a·bachengaha jeon saksako srape indakgipa a·selona sokaha ine u·inagita man·aha.
Adita somoirangna Garo Hills ni dingtang dingtang biaprangona Mongmarang nape, nokjamrangko aro manderangko kal·ake so·otanirangko niknagita man·enga. Indakgipa obostarangoni naljoke dongna man·agita, buringoni Mongmarang napbaon sepangona re·angjachina aro nanggipa ja·kurangko de·e naljoke dongna man·agita simsakna nanga.
