“Re·baenggipa Lok Sobha pu·onanio Garo Hills ni manderangna namgniko baseanio namen jajaanirang ong·enga, A·chik jat badia ramako re·gen? Jakrao sorkariko chalaienggipa BJP/NPP dolni ramakoma? Jakasio Congress dolna jean ka·onangrakgipa, toromni bidingo BJP dolko nidike kam ka·enggipakoma? ma bijangchio ong·enggipa Independent candidate jean Garo Hills na Winter Capital, Territorial Council, Reservation na dabidilgipa aro United A·chik State ba Garoland ko ra·bana kamko kagipana pu·ongenma?” ine Independent ni Candidate Laben Marak sing·a gnang aganangaha.
Unbaksana batanggimin bilsio Congress ni dilgipa Debora Marak jean Winter Capital aro Reservation backlog policy ko nipiltaina okumu chake dabigiparangko bon·atchina aro tangka paisa on·e dontongatchinagita didianiko an·ching u·inagita man·angaha ine Marak janapangaha. Uasan ong·aigija Congress ni Saleng Sangmani jat dol gittam chong·motan Garo, Khasi aro Jaintia na Job Reservation ko bakrimate 80 percent ong·atna ku·rang on·gipako seokgenma? Ma Independent Candidate Laben Marak jean GSMC Co-Chairman Balkarin Marak aro ASPF ni General Secretary Bernitha Marak baksa Winter Capital aro Reservation Back Log Policy na dabidile dukko chake, pattoko donatako man·e aro da·onaba ge 25 na bate badi ka·anirangko man·e manderangna dakgrikdilgipako seokgenma ine Marak aganangaha.
Iarang pilakkon nigrike an·ching A·chik sakantian an·tangtangni mikronrangko mikgaoate, jatna ka·sagipa aro A·chik a·songni namgnina kam ka·gipako baseani somoi ong·engaha ine Independent Candidate Laben Marak aganangaha.
