Spain a·songoni Meghalaya ona re·bae ru·uta bilsirangna dangdike on·gipa Missionary Sister Rosario Lopez Herreria jean March 28 tariko a·gilsakko watangahachim, uni manggisiko da·al salo West Garo Hills a·jani Tebronggre, Bethany Society uni dongchakram nok sepango gopaha.
Sister Rosario Lopez, Catholic toromni Missionaries of Christ Jesus (MCJ) congregation ni bak ong·achim. Ua Garo Hills, Mendal o be·ennigita bilgrigipa mikgri aro kanarangni janggi tangani gadangko tang·doatnagita an·tangko on·kange kamrangko ka·angaha. Uni ja·mano ua Khasi Hills-onaba re·ange apsan daken songsal aro a·dokni manderangna maming man·pilskaanina rikgija dangdike on·angaha.
Sister Rosario Lopez 1986 bilsio Tura, Bethany Society ko a·bachengdilaha jeon ua Araimile, Kamiparao mikron nikgijagiparangna Marian Integrated Education for the Blind koba bikotangaha, jekon adita somoirangni ja·man St. Gabriel ni Brothers rangna pakwatangaha. Una agreba Bethany Society ni biap chu·gimik damgni gnang jean New Tura, MBOSE headquarter sepango ge·sa aro ge·gipin Rongram, Tebronggre o ong·skaa. Apsan daken Shillong ni Veronica Lane o donggipa Bethany Society Institute-ba Sr. Rosario ni bimchipe kam ka·ani sakki ong·a.