Meghalaya a·doko bikotgipa mingbri bosturang chongmotan Garo Dakmanda (Meghalaya Garo Textile), Lyrnai Potterry, Meghalaya Chubitchi aro Lakadong turmeric, ru·utgija salrangna skang parakatgipa Geographical Indication (GI tag) ni bako biming segatako man·aha.
Ia bosturangko a·doko bikotani, Meghalaya ni dingtanggipa daka rikaniko mesokan baksana sak hajal 30 mang manderangna janggi tangani cholko on·enggipaba ong·a. GI tag ko man·anichi, a·doko chasongni chasongna ja·rikbaenggipa kamrangko ba changa sapaniko jakkale ripingani, janggi tangna cholko ra·baani aro jatni tang·doaniko sakki on·ani ong·a.
March 30 tarik 2024 o, Registrar of GI, Chennai, GI tag No. 741 o Lakadong Turmeric na Journal No. 185 Part 1 India sorkari nigita GI tag award ko pakwatangaha. Apsandake, Garo Textile, Lyrnai Pottery aro Meghalaya Chubitchi na GI tag ko journal No. 185 Part 3 nigita on·angskaaha.
