EGH Dobu Primary Health Centre (PHC) o doctor saksa maternity leave o ong·ani a·selo jolo songdongenggipa manderang sanna bannaniko ra·na neng·nikaniko man·enganina sakgipin doctor ko ta·rakkale watatskachina jinmani palo AHAM Dobu Regional Unit ni General Secretary Windam G. Momin a·jani DC na chittiko see u·iatangaha.
PHC o ka·enggipa doctor ni chutti ra·angaonin sakgipin doctor ko watata dongkuja aro ru·utbea somoirangonin Dobu PHC o sangipa doctor gri ong·enga ine Momin chittio janapataha. Iarangni a·selo rang·gitik sae ding·e sanna bannaniko nangmiting somoirango namen neng·nikanirangko man·enga maina ua jolni manderang kona noksikrango songdonggipa ong·e Williamnagar Civil hospital ona re·angnagita namen chel·bea ineba Momin janapataha.
Indakgipa obostarangko songdongenggipa manderangni chagrongenganina ua PHC o dongkamgipa doctor ko ta·rakkale watatpachina AHAM dol mol·molataha.
