Rongjengni bakrimgimin NGO dolrang jekai GSU, APA, AHAM, ASWA, AAYF, GSMC, AOSW, ACFI, NGCO aro FKJGP rang, Rongjeng Bazar ni sepango Babu Singh ni rikgimin nok buildingo adita somoirangna skang churangko dongchakenganiko aro chu dokanrangko dontongatchina ba gipin biapona apjitatchina East Garo Hills ni Deputy Commissioner na chitti see didiatangaha.
Ia building ara Government skuloni metre 50 mangnigitasan chelgrika ine NGO dolrang u·iatangaha. Meghalaya State Regulation on liquor license ni niamogitade metre 200 ni ning·o olakichakram biap, hospital aro bidako pakwatgipa biaprangni sepango chuko donna ba palnagita beng·ani donga ine NGO dolrang janapangaha. Indake churangko donna ba palna skang songsalo, bako ong·giparango aro manderang baksa maming agan golpogrikani gri license rangko on·aniara songsalna aro chatro chatrirangna namen namgijaniko ra·baani ong·a ineba uamang janapangaha.
Chuko palanichi a·dokni kajina man·aniko bariatani ong·genchimoba kajina man·anikosan dal·nikaigija poraienggipa bi·sarangko aro songsalkoba nie kamko ka·na nanga ine NGO dolrang aganangaha.
