A·dok sorkarini Home (Police) Department ni Pulis ni SP aro SP ni ka·mani gadango kam ka·giparangko Lok Sabha election ong·anina dingtang dingtang biapona transfer ka·china re·anggipa February 13 tariko u·iataniko on·genchimoba Tura Police Station ni Inspector Bitching N. Marak ko kamoniko apjitatgija donanina saksa Social Activist Nilberth Ch. Marak sing·doaniko dakangaha.
Police ni dingtang dingtang gadango kam ka·giparangko bilsi 4-5 na bate apsan biapo kam ka·na on·ani niam dongjagenchimoba, Tura Police Station ni Inspector Bitching Marak re·anggipa bilsi 15 na apsan biapon donge kam ka·nagita man·enga ine Marak aganangaha. Gimik officer rangko gipin a·jarangona transfer ka·rurae, Marak ko da·ona dipet gipin biaprangona maini gimin transfer ka·gija donenga, iani bidingo bang·a manderang jajaenga aro sorkarini uko dingtangmancha mikkang nitee kam ka·anina aro dongimin niamrangko pe·anina sing·doaniko dakangaha.
Police Inspector Bitching Marak ko Romba Adinggre ni Abal M. Sangma ni depante Sengbat Ch. Marak ko so·otanioba bak donganina Meghalaya High Court ni Division Bench badi ka·angaha aro ia a·selni bidingo tale am·sandinagita CBI na pakwatangaha. Unbaksana Bitching Marak aro uni jikgipa Tura, Akonggre o atchibagipa ong·e election ni somoio pu·ongiparangko saksa Officer ong·e aditan ku·monge kam ka·dilna bil donganina aro Lok Sabha election o maming neng·nika gri matchotatna man·agita uko gipin a·jaona ta·raken transfer ka·china didiangaha.
