March 16, 2024 tariko re·baenggipa Lok Sabha election-na model code of conduct ko ra·gatmangenchimoba, niamni a·palo Bangladesh a·songona bosturangko salanio a·dokni Chief Minister aro gipinrangko bako ong·atna cholko on·enganina NGH ni SP Bruno Sangma aro SGH Gasuapara ni Custom Officer ni kosako saksa Social Activist Nilbert Ch. Marak matnangate koborna parakataha.
Marak ni janapatanigitade ia bilsini January jaonin adita bosturang jekai rasin, chini, gue aro dingtang dingtang cha·ani bosturangko niamni a·palo ba nanggipa lekka pancharang chu·onggija Bangladesh ona hajalni hajal garirango da·alonaba salaniko niknagita man·enga ine u·iatangaha. NGH, Resubelpara Assam a·dokni sima ari jolo ong·ani a·selo, niamni a·palo bosturangko salenganiko nike NGH ni SP Bruno Sangma aro Custom Officer rangko lekka pancharangko ba license rangko nirikkianiko dakchina aganmanahaoba nirok simsakaniko dakgija batesa garirangko wate tangka cha·enga ine Marak janapataha.
Indake niamni a·palo bosturangko gipin a·songona salaniara Custom Act, 1962 ni Section 11(1) o dongimin niamko pe·ani ong·an baksana a·songo pale sim·e cha·giparangni man·gnirangko tang·onatani ong·a ineba Marak janapataha. Iani bidingo North Garo Hills ni SP, Bruno Sangma aro SGH Gasuapara ni Custom Officer ni kosako raka ja·kuko de·e bichalko on·china Social Activist Marak didiataha.
