NPP dolni Agatha Sangma, Lok Sabha election o manderangni chakpaaniko man·a, Tura songjinmani Anandamath aro Chetrigaon gittimni nokantiona re·roroe mijalo campaign ko ka·angaha. Agatha Sangma baksa Assembly Speaker aro North Tura ni MLA, Thomas A Sangma dongpae manderangko NPP baksa bakrime kam ka·na party ni palo mol·molangaha.
Ia somoio Agatha Sangma, bang·a jolo songdongenggipa manderangna NPP ni re·mikangna miksongenggipa nisanrangko talatange, a·dokna aro a·jana silroro namroroaniko ra·bana NPP baksa bakrimchina ku·pattie aganangaha. Sangma dingtangmancha antidam jolo songdongenggipa aro dokan dakenggipa nokgiparang baksaba agan golpogrike uamangni nanganirangko knae ra·ange kakket ong·e kamko ka·na parakangaha.
