Da·al salni bako NPP dolni Agatha K. Sangma na Chief Minister Conrad Sangma Tura-o tom·bimonganiko dakani somoio, UDP dolni Rajabala-o da·o ong·enggipa GHADC ni MDC Ashahel D. Shira, re·baenggipa Lok Sabha election-o NPP baksa nangrime kam ka·na an·tangko on·kangeaha.
Shira, uni bang·a ja·rikgiparang aro UDP dolo dilenggipa manderang baksa NPP ni padot Conrad Sangma ni mikkangona re·bae bakrimetokaha. Uamang ia re·baenggipa MP election-o NPP dolni Agatha K. Sangma na chakpae kamko ka·angna aro West Garo Hills a·jani a·kawe jolorango NPP baksa bakrime manderangni namgnina re·mikkangna ka·donganiko on·angaha. Ian a·dokni ge·sa political party chong·motan UDP dolna dal·a gimaani ong·aha.
