Mijal salo Chief Minister Conrad Sangma, Williamnagar songjinamao tom·anio, NPP dol NDA sorkarini bak ong·ani gimin ku·cholsan kam ka·enga ine aganangaha. Conrad Sangma ia kattarangko Dr. Mukul ni NPP aro Congress dolko BJP baksa bakrime kam ka·enggiparang ong·a ine matnange aganani ja·mano kobor ra·timgiparangni sing·anina aganchakangskaaha.
Dr. Mukul aro uamangni dolni kosako chinga maming ku·sakoba matnange agana dongja aro Garo Hills-o ia dolgnisa an·tangtangni kosako jaksi otgrike galongrikna jotton ka·enga ine Sangma aganangaha.
Williamnagar-o tom·ani bidingo ua aganangengon, ian damsa East Garo Hills-o gamchatbegipa songjinma ong·a aro ia tom·anio bang·a chakpagiparangko nike salaram jolni bang·a biaprangon chena ka·dongsoenga ine Sangma aganangaha. Ia tom·anio bang·a NPP ni dilgiparang aro ja·rikgiparangsan sokbaaigija gipin dolrangoniba re·bae NPP na chakpaaniko on·angaha ineba Sangma agandapangaha.
