A·king Nokmarangni ning·o songdongenggipa manderang, Urban Affairs Department-ni Tura-na bon·kamgipa Master Plan ko tarie on·ahanina uamangniko namnikgijaniko mesokna jegalaniko dakangaha. Dingtang dingtang biaprangoni jekai Chasingre, Rongkhon Edenbari, Rongkhon Megonggre aro Allotgre ni A·king Nokmarang baksana janapgimin songrango songdongenggipa maharirang dingtang dingtang obostarangchi Tura-na bon·kamgipa Master Plan ko tarina tik ka·angahanina, Municipality ni ning·o bak ong·pana nangnikjae jegalaniko Urban Affairs Department ni Director na chitti see u·iatangaha.
Tura-ni adita janapgimin biaprangko Municipality-ni ning·o ong·atna mangsongenganiko aganani bidingo ia biaprangni A·king Nokmarangna skanggipa u·iataniko on·gija Urban Affairs ni kam ka·aniara niamni a·palo ong·a ine A·king Nokmarang aganangaha. Skang chengonin chingni A·king Garo Hills Autonomous District Council (GHADC) ni ning·osa ga·akani gimin, GHADC-ni sason ni ning·o uamang dongnagita kusi ong·aia ine agandapangaha. Gipin A·kingni ning·o ga·akgipa a·arangko mai miksonganio jakkalna a∙maniko name tale u·iatgija maikai Urban Affairs Department-ni man·gimin a·arang ong·gen ineba janapangaha. Iani bidingo Nokmarang, chatchi ma·chongrang aro songdongenggipa manderang raken jegale tarigimin lekkarangko ra·galpilchina dabiangaha.
