Lok sabha election-na TMC dolo susaenggipa Zenith Sangma campaign ka·ani somoio, re·anggipa March 14 tariko Junior Division Accountant (JDA) kamna sak 35 seokako man·anio sak gittam A·chikrangkosan seokanina sorkariko sing·doaniko dakangaha. Sak 35 manderangko seokanio A·chikrangna a·kanggimin 40% ko chane niatgenchimode, sak 3 kosan ong·aigija sak 13 A·chik jatko seokna nangao ga·aka. Indake ong·genchimode ia sak 10 ara bachi gimaaha ine sorkariko matnange sing·doangaha.
Batanggimin Assembly budget session-o, Reservation Policy-ko Khasi, Jaintia aro Garo jat gittamnan bak dakgija nangrimate 80% ko on·china Saleng Sangma ni agananikoba Zenith Sangma janape aganangaha. Reservation policy ko jat gittamna 80% ko ra·gatode maibakai Khasi jatrang poraia skiani gadango nambatgiparang ong·ahaode, A·chikrangna a·kange dongimin kamrangkoba man·angskagen maina poraia skiani a·bao Khasi jatrangko A·chikrang srapkujaenga ine Sangma aganangaha. Indakgipa obostarangko nikgenchimoba Congress dolo susaenggipa Saleng Sangma jatni man·gniko bon·atna agangipa mande jatko dilode mai ong·gen ine Sangma agandapangaha.
